ប្រកាសចូលកាន់តំណែងប្រធានសាលាដំបូងខេត្តក្រចេះ

ខេត្តក្រចេះ ៖ ឯកឧត្តម កើត រិទ្ធ រដ្ឋមន្រ្តីក្រសួងយុត្តិធម៌បានអញ្ជើញជាអធិបតីដ៏ខ្ពង់ខ្ពស់ ក្នុងពិធីប្រកាសចូលកាន់តំណែងប្រធានសាលាដំបូងថ្មី នៅខេត្តក្រចេះ ដែលប្រព្រឹត្តទៅនារសៀលថ្ងៃ១១កើត ខែស្រាពណ៍ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី៣១ ខែកក្កដា ឆ្នាំ២០២០។

ក្នុងពិធីនេះផងដែរ ក៏មានការអញ្ជើញចូលរួមពីសំណាក់ ឯកឧត្តម ហឿ ស៊ីយ៉ែម ប្រធានក្រុមប្រឹក្សាខេត្ត ឯកឧត្តម វ៉ា ថន អភិបាល នៃគណៈអភិបាលខេត្ត រួមនិងឯកឧត្តម អមដំណើរ និងសមាជិកឧត្តមក្រុមប្រឹក្សានៃអង្គចៅក្រម កងកម្លាំងទាំងបីប្រភេទ លោកប្រធាន អនុប្រធានមន្ទីរ និងមន្រ្តីសាលាដំបូងខេត្តជាច្រើនរូបទៀតផងដែរ។

ឯកឧត្តម វ៉ា ថន អភិបាលនៃគណៈអភិបាលខេត្តក្រចេះបានការកោតសរសើរចំពោះលោកជំទាវ អ៊ិន ម៉ានិត ដែលបានអនុវត្តការងារកន្លងមកបានល្អប្រសើរ និងមានសហការគ្នាគ្រប់ស្ថាប័នពាក់ព័ន្ធបានទូលំទូលាយ ដោយឈរលើគោលការច្បាប់ជាមូលដ្ឋាន។ ទន្ទឺមនោះ ឯកឧត្តមក៏បានស្វាគមន៍ចំពោះ ឯកឧត្តម តុប ឈុន ហេង ដែលទើបនឹងឡើងកាន់មុខតំណែងថ្មីនាពេលនេះ ក្នុងនាមអាជ្ញាធរខេត្តនឹងបន្តសហការគ្នាក្នុងវិស័យយុត្តិធម៌ឲ្យបានល្អ និងប្រកបដោយយុត្តិធម៌ សច្ចធម៌ និងតម្លាភាព គ្មានអំពើពុករលួយ។ បន្ថែមលើ ឯកឧត្តមភិបាលខេត្តក៏សូមជូនពរឯកឧត្តម តុប ឈុនហេង មានសុខភាពល្អ កម្លាំងមាំមួនដើម្បីដឹកនាំការងារក្នុងវិស័យយុត្តិធម៌សម្រាប់ខេត្តក្រចេះបានជោគជ័យនាពេលអនាគត។

ថ្លែងក្នុងពិធីនេះដែរ ឯកឧត្តម រដ្ឋមន្រ្តីក្រសួងយុត្តិធម៌ បានសំដែងការកោតសរសើរ និងអរគុណជាច្រើនដល់អាជ្ញាធរគ្រប់លំដាប់ថ្នាក់ ពិសេសឯកឧត្តមគណៈអភិបាលខេត្តក្រចេះដែលកន្លងមកបានជួយគាំទ្រនិងផ្តល់កិច្ចសហការល្អចំពោះលោកជំទាវ អ៊ិន ម៉ានិត បានអនុវត្តតួនាទីរបស់ខ្លួនដោយមានប្រសិទ្ធភាព។ ទន្ទឹមនឹងនោះ ឯកឧត្តមរដ្ឋមន្រ្តី សង្ឃឹម និងជឿជាក់យ៉ាងមុតមាំថា ឯកឧត្តម តុប ឈុនហេង ដែលទើបនឹងឡើងកាន់តំណែងថ្មី និងខិតខំយកចិត្តទុកដាក់បំពេញភារកិច្ចឲ្យបានម៉ឺងម៉ាត់ប្រកបដោយស្មារតីទទួលខុសត្រូវខ្ពស់ក្នុងការដឹកនាំស្ថាប័នអយ្យការអមសាលាដំបូងខេត្តក្រចេះឲ្យមានភាពកាន់តែសុក្រឹតមួយកំរិតថែមទៀតក្នុងការផ្តល់ភាពយុត្តិធម៌ សច្ចធម៌ តម្លាភាពជូនប្រជាពលរដ្ឋយើង។ ពិសេសត្រូវពង្រឹងនូវសាមគ្គីភាពផ្ទៃក្នុង និងកិច្ចសហប្រតិបត្តិការជាមួយអាជ្ញាធរដែនដី ក៏ដូចជាអាជ្ញាធរមានសមត្ថកិច្ច និងមន្រ្តីអនុវត្តច្បាប់ទាំងអស់ឲ្យបានកាន់តែប្រសើរក្នុងស្មារតីគោរពគ្នាទៅវិញទៅមក ដោយផ្អែកលើតួនាទី និងភារកិច្ចដែលច្បាប់ប្រគល់ជូនរៀងៗខ្លួន និងអនុវត្តតាមច្បាប់ជាមូលដ្ឋាន។

ជាមួយនោះដែរ ឯកឧត្តមរដ្ឋមន្រ្តី ក៏បានបញ្ជាក់ផងដែរ នេះជាការកែទម្រង់នៅក្នុងវិស័យយុត្តិធម៌ឲ្យតែមានភាពប្រសើរឡើង និងបានណែនាំក្រើនរំលឹកដល់ ឯកឧត្តម តុប ឈុនហេង ដែលទើបនឹងចូលកាន់តំណែងប្រធានសាលាដំបូងខេត្តក្រចេះថ្មី និងមន្រ្តីរាជការទាំងអស់ នៃសាលាដំបូងខេត្តក្រចេះត្រូវចូលរួមលើកកម្ពស់កិត្តិយស សេចក្តីថ្លៃថ្នូរ និងកិត្យានុភាពនៃអង្គចៅក្រមក៏ដូចលើកកម្ពស់គុណភាពការងារនៃការកាត់ក្តីឲ្យបានយុត្តិធម៌ តម្លាភាពសំដៅលើសេវាយុត្តិធម៌ ងាយស្រួល ឆាប់រហ័ស និងមានជំនឿទុកចិត្តពីសាធារណជនចំពោះវិស័យយុត្តិធម៌នៅកម្ពុជា៕